12-13 ліпеня адбыліся паўфінальныя і фінальныя туры ХVІ Рэспубліканскага конкурсу беларускіх народных парных танцаў “Лявоніха”, як адно з галоўных заключных імпрэзаў ХІІ фестывалю фальклорнага мастацтва “Берагіня”.
Удзельнікі турніру з розных абласцей Беларусі, якія спаборнічалі паміж сабой на сцэне Акцябрскага цэнтра вольнага часу, прадстаўлялі мясцовыя варыянты шырока вядомых народна-побытавых танцаў “Лявоніха”, “Полька імправізаваная”, “Мікіта”, “Нарэчанька”, Падыспань”, “Карапет” і іншых. Канкурсанты дэманстравалі сваё выканальніцкае майстэрства ў 4 узроставых групах: ад 10 да 14 гадоў, ад 15 да 20, ад 20 да 40 і ад 41 года і вышэй. Па выніках першага дня танцавальнага конкурсу ў фінал выйшлі па 5 пар з кожнай узроставай групы, Усе танцоры выкладваліся, як кажуць па поўнай, таму членам прадстаўнічага журы было вельмі няпроста вызначыць лепшых, асабліва ў фінальнай частцы турніру. Таму для некаторых пар, якія набралі аднолькавую колькасць вышэйшых балаў (4 па 10 альбо 40 у выніку), праводзілася дадатковая ператанцоўка.
Хто ж стане пераможцамі і прызёрамі ХVІ Рэспубліканскага турніру народных парных танцаў, мы даведаемся 14 ліпеня на ўрачыстым закрыцці сёлетняга фестывалю фальклорнага мастацтва “Берагіня”.
Юрый Каспяровіч.
